باداز او كسكس الذرة الخالي من #الكلوتان

السلام عليكم البنات اليوم غنقدم ليكم باداز اي مسكسو ديال الذرة  بالورقية و الكرداس و القديد و الخضرة كيفما كتعرفو الذرة صحية و خالية من الكلوتان

باش نصايبو باداز ديالنا او أبلبول بالشلحة حاجتنا ب:

 1 كيلو ديال دقيق الذرة

1 بصلة مشلضة

 1 مطيشة محكوكة

الورقية أو الزكزاو بالشلحة 

الكرعة

خيزو

كورجيت 

اللفت

شوية القديد و الكرداس

و الزيت البلدية

بالنسبة للعطرية: البزار 

الكامون

سنجبير 

عطرية لحية الشيخ

شوية ديال السمن

الملحة ماديروهاش حتى دوقو راه الكرداس و القديد عامرين بالملحة

الطريقة:

بالنسبة للمرقة بحال المرقة ديال الكسكسو كنشحرو الكرداس و القديد مع البصلة و مطيشة و الربيع و العطرية و الزيت حتى يتشحر كلشي نظيفو الماء الكافي و نخليوها حتى تبدا طبخ نزيدو خيزو و الورقية و عطرية لحية الشيخ و شوية ديال السمن و نمشيو نفتلو باداز ديالنا

كناخدو دقيق الذرة هو كيما قلت ليكم راه خالي من #الكلوتان 

كنرشوه شوية بالما و نبقاو نخلطو باش يدخل الما بحال كيما كنديرو في الزميتة نرشو الما تدريجيا و نفتلو حتى كنشوفو راه ولى بحال الكسكسو تندخلو ليه تقريبا نص ليترو ديال الماء ويلا شفتو كويرات ماتخافوش كندوزوه في غربال واسع كيتحلو الكويرات و تنديروه في الكسكاس يتفور التفويرة الأولى

كنخليو يتفور تقريبا ساعة ديال الماكانة حيت باداز تيبغي الطياب

ملي تدوز ساعة تنحيدوه و نرشو عليه الما تدريجيا تاني حتى يتحل و يشرب لينا الماء تقريبا نص ليترو أخر ديال الماء تدريجيا.

 نخليوه واحد 5 دقايق يشرب الما و زيدو الكرعة و الكورجيت للبرمة من بعد نرشو كاس ديال الزيت لباداز ديالنا و نخلطو مزيان دخل فيه الزيت و نردوه يتفور التفويرة التانية و خليوه يطيب تقريبا ساعة عاود حيت كيما قلت ليكم باداز تايبغي الطياب مللي تيطيب تنحطوه في طبق التقديم و نسقوه دغيا ماتخليوهش يبرد و بالصحة و الراحة