بريوش بتلات الوان رائع و اقتصادي

المقادير

500g  دقيق

 نص ليترو حليب

   60g   زبدة مدوبة   

80g سكر

جوج معالق عسل

خميرة معجونة

 و قليل من الملح

للتزيين

 20g كاكاو

 1 معيلقة نيسكافي

الطريقة

كنعجنو جميع المكونات بالحليب و ندلكو العجينة مزيان و نقسموها على خمسة قطع متساوية

كنخلطو الكاكاو بشوية دالحليب باش يسهال لينا دمجه مع العجين 

وندوبو القهوة في قليل من الحليب

كنخدو واحد القطعة كنضيفو ليها خليط الكاكاو  و قطعة اخرى نضيفو ليها خليط القهوة  وندلكوهم كل قطعة بوحدها الى جات جارية اصيفي شوية الدقيق حتى تكون عجينة لينة نفس الشئ للقطعة الاخرى اللي ضفنا ليها القهوة

هاكا كتكون عندنا تلات قطع بيضاء و وحدة مخلطة بالكاكاو و وحدة مخلطة بنسكافي كنغطوهم اخمرو

بعد مايخمرو كنطلقو قطعة من العجين الابيض بالمدلك و على شكل مستطيل 

تم نبسطو عليها مباشرة عجين الكاكاو

تم العجين الابيض تم عجين القهوة و في الأخير العجين الابيض المتبقي 

كنعاودو نسرحوهم بالمدلك و نليوهم على شكل رولو

ونقطعوه دوائر بحال الشنيك

كنحربلو شوية هده الدوائر تولي طويلة شوية 
 كندهنو المول ونحطو القطع وحدة ملاصقة فالاخرى بطريقة مائلة حتى يعمر المول و خليهم في المول حتى يخمرو مزيان و دنخلوه للفرن يطيبو 

بالصحة و الهنا