المقادير
نصف كيلو شعرية ديال السفة
صدر الدجاج
قزبور و معدنوس
بصلة مشلضة
الحامض المرقد
الملحة سكنجبير+ البزار+ الزيت + الرومية + نصف كاس الزيت البلدية + جوج معالق الزبيب مصلوق
للتزين القرفة السكر كلاسي و اللوز مصلوق و مقلي
الطريقة
كندهنو الشعرية ديالنا بمقدار جوج معالق الزيت و نخلطوها مزيان بدينا توصلها الزيت كلها و نحطوها في الكسكاس فوق ماء كيغلي و نخليوها تفور تقريبا 20 دقيقة
نحيدوها و نرشوها بمقدارغراف صغير ديال الماء دافي و مملح و نحركوها بالاصابع ديالنا باش تشرب داك الماء و نردوها تفور تاني شي 15 دقيقة
و نكررو هدا العملية حتى نفوروها تلات مرات ملي نحيدوها من التفويرة التالتة ندهنوها بجوج معالق من الزبدة و نزيدو الزبيب
كيما كتشوفو الحجم ديالها تضاعف
نردوها تفور التفويرة الرابعة و الاخيرة ملي نحيدوها ندهنوها بمعلقة زبدة و نزيدولها السكر كلاسي حسب الرغبة انا زدت جوج معالق
بالنسبة للدغميرة انا درت صدر الدجاج مقطع لعدة قطع و زدت بصلة مشلضة و القزبور و المعدوس و التومة و الملحة و البزار و سكنجبير والحامض المرقد و الزيت البلدية و نخليو كلشي يتشحر مزيان نزيدو الماء و نسدو على كلشي في الكوكوط واحد 15 دقيقة
ملي كل شي يوجد كنديرو الايطار فوق طبسيل التقديم و نسبقو القسم الاكبر من الشعرية و زيدو فوقها قطع اللحم و نسقيوها بالمرق
و نزيدو فوقها اللي بقى من الشعرية و نزوقوها بالسكر كلاصي و القرفة و اللوز
نحيدو الايطار و نقدموها
بالصحة و الهنا
0 التعليقات:
إرسال تعليق